Казакстан Дүйнөлүк көчмөндөр оюндарында командалык эсепте биринчи орунду ээледи
VI Дүйнөлүк көчмөндөр оюндары жогорку деңгээлде өтүп, чоң спорттук майрам катары жыйынтыкталды. Мындай пикирин президенттин басма сөз катчысы Аскат Алагозов өзүнүн социалдык баракчасында билдирди.
Анын айтымында, көк бөрү жана жер улак боюнча кыргызстандык жана казакстандык командалар жогорку деңгээлдеги оюн көрсөтүп, атаандаштык спорт аянтчасында гана каларын дагы бир жолу далилдешти. Ошондой эле күйөрмандардын арасында эч кандай тартип бузуу катталган жок.
Командалык эсеп боюнча бир гана техникалык айырма медалдарды эсептөөдө жаралган. Бүгүн уюштуруу комитети Казакстандын үч спортчусунун ар биринин медалын өзүнчө эсептөө чечимин кабыл алды. Ошентип, жалпы командалык эсепте Казакстан биринчи орунду ээледи.
Аскат Алагөзов казакстандык спортчуларды жеңиши менен куттуктап, кыргызстандык спортчулар да оюндарда өз күчүн жана чеберчилигин татыктуу көрсөтүшкөнүн белгиледи.
"Медалдын эсеби спорттун бир бөлүгү, ал эми бул оюндардын эң чоң жеңиши атаандаштыкты сый-урмат менен өткөрүп, боордош элдердин ынтымагын дагы бир жолу көрсөтө алганыбыз болду" – деп билдирди Алагозов.
