ЖКтин депутаттары балага кош фамилия ыйгарууга уруксат берүүнү сунушташты
Жогорку Кеңештин депутаттары ата-энелердин макулдашуусу боюнча балага ата-энесинин фамилияларын дефис аркылуу каалаган тартипте бириктирүүдөн түзүлгөн кош фамилия ыйгарууга уруксат берүүнү сунушташты.
Тиешелүү өзгөртүүлөрдү «Жарандык абалдын актылары жөнүндө» мыйзамга киргизүү тууралуу мыйзам долбоорун депутаттар Ырысбек Атажанов, Болотбек Борбиев, Дастан Бекешев жана Сеидбек Атамбаев демилгелеп, коомдук талкууга чыгарышты.
Мыйзам долбоорунун негиздемесинде белгиленгендей, анын максаты — ар башка фамилиядагы ата-энелерге өз ара макулдашуу аркылуу баланын фамилиясында ата-энесинин эки фамилиясын тең сактап калуу мүмкүнчүлүгүн берүү болуп саналат.
Мындан тышкары, мыйзамдын 17-беренесинин 1-бөлүгү менен ошол эле берененин башка ченемдеринин, ошондой эле КРнын Үй-бүлө кодексинин нормаларынын ортосундагы карама-каршылыкты жоюу жана Кыргызстанда өзүнүн ат коюу салттарына ээ болгон ар түрдүү этностук топтордун өкүлдөрү жашарын эске алуу менен үй-бүлөлүк улантуучулукту сактоого укуктук шарттарды түзүү максатталган.
Ошол эле учурда мыйзам долбоорунда кийинки муундарда фамилияларды ашыкча татаалдаштырууга жол бербөө максатында балага үч фамилия ыйгарууга жол берилбей турганы белгиленген.
Демилгечилер мыйзам долбоору кабыл алынган учурда мурда берилген документтерди кайра тариздөөгө зарылчылык жаралбай турганын белгилешти. Ошондой эле өзгөртүүлөр туулгандыгы мамлекеттик каттоодон мурда эле өткөн адамдарга жайылтылбайт.
