Күн электр станциясы үчүн бөлүнгөн 800 гектар жер боюнча мыйзам бузуу аныкталды
Башкы прокуратура кайра жаралуучу энергия булактарын өнүктүрүү, ишкерлердин укуктарын коргоо жана айыл чарба багытындагы жерлерди пайдалануу боюнча мыйзамдардын сакталышын текшерди. Бул тууралуу мекеменин маалымат кызматы кабарлады.
Маалыматка караганда, текшерүүдө күн электр станциясын курууга бөлүнгөн 800 гектар айыл чарба жерин башка категорияга өткөрүүдө эсептөөлөр туура эмес жүргүзүлгөнү аныкталган. Тактап айтканда, айыл чарба өндүрүшүнүн жоготууларын эсептөөдө коэффициент негизсиз колдонулган.
Ушундан улам "Ч" ЖЧКсына 47,3 млн сомдон ашык төлөм эсептелген. Прокуратуранын чара көрүүсүнөн кийин эсептөөлөр кайра каралып, мыйзам бузуу жоюлган. Натыйжада ишкерге 23,9 млн сомдон ашык негизсиз финансылык чыгымдын алдын алуу мүмкүн болгон.
Мыйзам бузууга жол берген жергиликтүү каттоо органынын кызматкерлери тартиптик жоопкерчиликке тартылды. Башкы прокуратура инвестициялык долбоорлорго негизсиз тоскоолдуктарды жоюу жана ишкерлердин укуктарын коргоо боюнча иштер улантыларын билдирди.
