Медициналык ишмердүүлүктү лицензиялоо санариптик форматка өткөрүлдү
Кыргызстанда медициналык жана фармацевтикалык ишмердүүлүктү лицензиялоо процессин жөнөкөйлөтүү жана санариптештирүү боюнча реформа аяктады. Бул тууралуу Саламаттыкты сактоо министрлигинен маалымдашты.
Билдирүүгө караганда, реформанын алкагында мамлекеттик маалыматтык системалар менен интеграцияланган “Саламаттык сактоо тармагында лицензиялоо” маалыматтык системасы иштелип чыгып, өнөр жайлык эксплуатацияга киргизилди.
Эми өлкөнүн каалаган аймагындагы ишкерлер Саламаттык сактоо министрлигине жеке кайрылбастан, лицензия алуу үчүн онлайн режимде арыз бере алышат, керектүү документтерди тапшырып, мамлекеттик кызмат үчүн төлөм жүргүзүп, арызды кароо процессинин жүрүшүн көзөмөлдөй алышат.
Реформанын негизги натыйжаларынын бири — лицензия берүү мөөнөтүнүн 30 күндөн 6–15 күнгө чейин кыскартылышы болду.
Кызмат көрсөтүүнү санариптик форматка өткөрүү кагаз түрүндөгү документ жүгүртүүнү жана ишкерлерге түшкөн административдик жүктү азайтууга, ошондой эле Кыргызстандын бардык аймактарындагы ишкердик субъекттери үчүн лицензия алууну кыйла жеткиликтүү кылууга мүмкүндүк берет.
