Шайлоо участогундагы шайлоочулардын саны 4 миңге чейин көбөйтүлөт
Бүгүн Борбордук шайлоо комиссиясынын жыйынында шайлоо округдары менен участокторунун схемаларын жана чек араларын башкаруу тартибине өзгөртүүлөрдү бекитти. Жаңы жобого ылайык, ар бир шайлоо участогундагы шайлоочулардын саны 3 миңден 4 миңге чейин көбөйтүлөт.
БШКнын маалымат кызматынан билдиргендей, мындай чечим талаптарга жооп берген имараттардын жетишсиздигинен улам жаңы шайлоо участокторун ачуу зарылдыгын азайтуу максатында кабыл алынды. Ошондой эле бул материалдык-техникалык жана каржылык ресурстарды үнөмдөөгө, уюштуруучулук жана эмгек акыга кеткен чыгымдарды оптималдаштырууга шарт түзөт.
Мындан тышкары, калктын санынын өсүшү жана курулуштардын тыгыздыгы эске алынат. Ушуга байланыштуу шайлоо участокторунун чек араларын аныктоодо жергиликтүү өз алдынча башкаруу органдарына көбүрөөк мүмкүнчүлүк берилет.
Өзгөртүүлөр БШКнын 2025-жылдын 28-июлундагы №41 токтому менен бекитилген жобого киргизилди.
