"Бала ырысына" 285,6 млн сом төлөм жүргүзүлдү
Эмгек, социалдык камсыздоо жана миграция министрлиги 10-сентябрда "Бала ырысы" ай сайын берилүүчү мамлекеттик жөлөкпулунун кезектеги төлөмү каржыланганын билдирди.
Маалымат базасы жаңыртылып, жарандардын арыздары иштелип чыккандан кийин төлөм алууга 232 229 алуучу түзүлдү. Каржылоонун жалпы суммасы 285 млн 588 миң 480 сомду түздү.
Эске салсак, "Бала ырысы" төрөлгөндөн тартып үч жашка чейинки балдарга берилет. Жөлөкпулдун базалык өлчөмү айына 1 200 сом. Айрым калктуу конуштарда сумма райондук коэффициенттерди эске алуу менен эсептелет.
Министрлик жөлөкпулдарды дайындоо жана төлөө процесстерин мындан ары да өркүндөтүү иштери улантыларын белгиледи.
