Бишкекте эң бийик айланма дөңгөлөгү бар - “Асман Парк” ачылды
Көп жылдар бою кароосуз калган мурдагы “Асанбай” паркын кайрадан реконструкциялоонун негизинде, “Асман Парк” үй-бүлөлүк оюн-зоок борбору ачылды. Парктын салтанаттуу ачылыш аземи 9-сентябрда, борбор калаанын мэри Айбек Джунушалиевдин катышуусунда өттү.
Майрамдык иш-чарага Жогорку Кеңештин депутаттары, “Асман Парктын” жетекчилери жана калаа тургундары менен коноктору катышышты.
Мэрдин айтымында, бул жерде мамлекеттик-жеке өнөктөштүк долбоорунун алкагында комплекстүү реконструкциялоо, көрктөндүрүү жана жашылдандыруу иштери жүргүзүлдү.
“Бүгүн борбор калаабызда дагы бир сонун жай — “Асман Парк” ачылып жатат. Көп жылдар бою кароосуз калган аймак бүгүн заманбап, коопсуз жана эс алууга ыңгайлуу жайга айланууда”, — деп белгиледи мэр Айбек Джунушалиев.
Билдирүүгө караганда, долбоорго 1 млрд сомдон ашык инвестиция тартылган. Реконструкциянын алкагында паркта заманбап эс алуу зоналары, сейилдөөчү аллеялар, оюн-зоок аянтчалар жана футуристтик дизайн элементтери пайда болду. Аймакка 1 000ден ашуун жашыл бак-даракдар жана декоративдүү көчөттөр отургузулду.
Ал эми “Асман Парктын” башкы символу — 92 метр бийиктиктеги “Бишкек жылдызы” аттуу айланма дөңгөлөк болуп калды. Маалыматка ылайык, ал Борбордук Азиядагы эң бийик айланма дөңгөлөк болуп саналат. Анын бийиктигинен Бишкектин тоолоруна көз чаптырган панорамалык көрүнүш ачылат.
