Бишкекте коомдук транспорт үчүн бөлүнгөн тилкелердин иштөө режими өзгөрөт

Бишкекте жеке автоунааларга коомдук транспорт үчүн бөлүнгөн тилкелер менен график боюнча жана дем алыш күндөрү жүрүүгө уруксат берилет. Тиешелүү чечим мэрдин орун басары Рамиз Алиев төрагалык кылган Жолдор боюнча штабдын жыйынында кабыл алынды. Бул тууралуу мэриянын басма сөз кызматынан билдиришти.

Жаңы тартипке ылайык, иш күндөрү саат 08:00дөн 20:00гө чейин жеке автоунаалардын бөлүнгөн тилкелер менен жүрүүсүнө тыюу салынат. Саат 20:00дөн 08:00гө чейин, ошондой эле ишемби жана жекшемби күндөрү жеке транспорттун бул тилкелер менен жүрүүсүнө уруксат берилет.

Өзгөртүү жол кыймылын уюштуруу схемаларына тиешелүү түзөтүүлөр киргизилип, жол белгилери орнотулгандан кийин күчүнө кирет.

Жыйында шаардагы жол куруу жана оңдоо иштеринин жүрүшү да каралды. 4-сентябрга карата иштер 151 көчөдө башталган. Анын ичинен 125 көчөдө жол оңдолуп, 26 көчөдө тротуарлар курулуп жана реконструкцияланууда. Жалпысынан 84 көчөдөгү иштер аяктаган.

Мындан тышкары, мектептердин жанындагы жол белгилерин жана жөө адамдар өтүүчү өтмөктөрдүн чийиндерин жаңыртуу тапшырылды. Ошондой эле жыл аягына чейин шаарда дагы алты оңго бурулуучу кошумча тилке уюштурулуп, алардын жалпы саны онго жеткирилет.

Бөлүнгөн тилкелерде жол кыймылынын эрежелеринин сакталышын көзөмөлдөө күчөтүлүп, үзгүлтүксүз рейддер өткөрүлөт.