Кыргызстанда 100 млн долларлык "Сары-Таш" логистикалык борбору түзүлөт
Бүгүн Инвестициялар боюнча улуттук агенттик менен "Текстиль Транс" ЖЧКсы "Сары-Таш" эл аралык транспорттук-логистикалык борборун түзүү боюнча өз ара түшүнүшүү жана кызматташтык жөнүндө меморандумга кол коюшту. Бул тууралуу агенттиктин маалымат кызматы кабарлады.
Маалым болгондой, долбоорго 100 млн долларга чейин инвестиция тартуу пландалууда. Борбор Кытай - Кыргызстан - Өзбекстан - Ооганстан багытындагы эл аралык транспорттук каттамдын алкагында түзүлүп, келечекте Пакистанга чыгуу мүмкүнчүлүгүн карайт.
Долбоор жүктөрдү сактоо, топтоо жана кайра жүктөө, таразага тартуу, бажылык-брокердик коштоо жана санариптик көзөмөл жүргүзүү үчүн заманбап инфраструктураны түзүүнү камтыйт.
"Кыргызстан үчүн бул жөн гана жаңы логистикалык объектти түзүү эмес. Биз өлкөнүн Кытай, Борбордук жана Түштүк Азиянын ортосундагы маанилүү транспорттук жана соода түйүнү катары ролун күчөтүүгө чоң мүмкүнчүлүк көрүп жатабыз. "Сары-Таш" долбоору транзиттин, сооданын жана өндүрүштүн өнүгүшүнө, ошондой эле жаңы жумуш орундарын түзүүгө өбөлгө түзүшү керек", - деди Улуттук агенттиктин башчысы Равшанбек Сабиров.
Меморандум ошондой эле транспорттук-бажылык логистика жана текстиль кластерин өнүктүрүү багытындагы долбоорду даярдоо жана ишке ашыруу боюнча тараптардын узак мөөнөттүү кызматташуусун карайт.
