Кыргызстанда калктын финансылык сабаттуулугу 4 пайызга өстү
Улуттук банк өлкөнүн эресеге жеткен калкынын финансылык сабаттуулугу боюнча үчүнчү улуттук изилдөөнү аяктады. Жыйынтык мекеменин сайтына жарыяланды.
2025-жылдагы изилдөөнүн жыйынтыгына ылайык, калктын финансылык сабаттуулугунун жалпы көрсөткүчү 2021-жылга салыштырмалуу 4 пайызга өсүп, 20 баллдан 11,8 баллды түздү. Улуттук банк белгилегендей, бул көрсөткүч 2023-жылы Экономикалык кызматташтык жана өнүктүрүү уюмунун (ЭКӨУ) эл аралык изилдөөсүндө Венгрия, Италия жана Литва сыяктуу айрым жогорку кирешелүү өлкөлөрдө катталган көрсөткүчтөрдөн жогору.
Финансылык билимдердин деңгээли төрт жылда 10 пайызга жогорулаган. Ошондой эле финансылык жүрүм-турум көрсөткүчү 3 пайызга өсүп, 69 пайызды түзгөн. Бул жарандардын каражаттарын башкарууга жана бөлүштүрүүгө сарамжалдуу мамилеси жакшырганын көрсөтөт.
Ошол эле учурда финансылык каражаттарга болгон мамиленин көрсөткүчү 8 пайызга төмөндөгөн. Бул калктын бир бөлүгү узак мөөнөттүү финансылык пландардан көрө учурдагы муктаждыктарга көбүрөөк көңүл буруп жатканын же финансылык белгисиздикке туш болуп жатканын көрсөтөт.
Изилдөөдө мындан тышкары финансылык бакубаттуулук, финансылык туруктуулук, санариптик финансылык сабаттуулук жана финансылык жеткиликтүүлүк да бааланган.
Изилдөө Бишкектеги ЕККУнун Программалык кеңсесинин колдоосу менен Экономикалык кызматташтык жана өнүктүрүү уюмунун эл аралык методикасынын негизинде жүргүзүлдү. Кыргызстанда мындай изилдөөлөр буга чейин 2017 жана 2021-жылдары өткөрүлгөн.
