Кытайдагы ири жарманкеде Кыргызстан инвестициялык мүмкүнчүлүктөрүн тааныштырууда
Инвестициялар боюнча улуттук агенттиктин башчысынын орун басары Мээримбек Койчуманов Кытайдын Сямынь шаарында өтүп жаткан 26-Кытай эл аралык инвестициялар жана соода жарманкесине катышууда.
Агенттиктен билдиришкендей, жарманкеге 129 өлкө жана аймактан 1 200дөн ашуун мамлекеттик мекеме жана бизнес-делегация, ошондой эле 30 эл аралык уюмдун өкүлдөрү катышууда. Иш-чаранын алкагында инвестициялык форумдар, тематикалык сессиялар, презентациялар жана инвестициялык долбоорлордун роуд-шоулары өткөрүлүүдө.
Ишкердик программанын алкагында Мээримбек Койчуманов Кыргызстандын инвестициялык потенциалын, инвестиция үчүн келечектүү багыттарды жана биргелешкен долбоорлорду ишке ашыруу мүмкүнчүлүктөрүн тааныштырды. Ошондой эле чет өлкөлүк инвесторлор үчүн артыкчылыктуу тармактар жана ишкердик кызматташтыкты өнүктүрүү мүмкүнчүлүктөрү тууралуу маалымат берди.
Улуттук агенттиктин бул эл аралык жарманкеге катышуусу Кыргызстандын инвестициялык мүмкүнчүлүктөрүн эл аралык бизнес коомчулугуна таанытууга, потенциалдуу инвесторлор менен байланыштарды кеңейтүүгө жана жаңы биргелешкен долбоорлорду ишке ашырууга багытталган.
