Кытайдын ири компаниялары Кыргызстанга кызыгууда
Бүгүн Инвестициялар боюнча улуттук агенттиктин башчысы Равшанбек Сабиров Кытайдвын 19 ири компаниясынын жетекчилери менен жолугушту.
Агенттиктин маалыматына ылайык, жолугушууда кайра жаралуучу энергетика, жасалма интеллект, машина куруу, тоо-кен жана кайра иштетүү өнөр жайы сыяктуу тармактардагы инвестициялык долбоорлор талкууланды. Компаниялардын арасында Tesla жана Apple компанияларына тетиктерди жана технологиялык чечимдерди жеткирген ишканалар бар.
"Кыргызстан узак мөөнөттүү инвестицияларды, заманбап технологияларды жана алдыңкы өндүрүштүк чечимдерди тартууга кызыкдар. Биз үчүн жаңы өндүрүштөрдү өнүктүрүү, технологияларды локалдаштыруу жана жаңы жумуш орундарын түзүү маанилүү", - деди Равшанбек Сабиров.
Кытайлык компаниялар Кыргызстандын инвестициялык потенциалын тереңирээк изилдөөгө жана конкреттүү долбоорлорду иштеп чыгууга кызыкдар экенин билдиришти. Тараптар сунушталган долбоорлор боюнча ишти улантууну макулдашты.
