Жети-Өгүздө 226 млн сомдук жаңы мектеп курулуп бүттү
Ысык-Көл облусунун Саруу айылында 500 орундуу жаңы мектептин курулушу толук аяктап, объект жаңы окуу жылына карата пайдаланууга даяр болду. Бул тууралуу Курулуш министрлигинен билдиришти.
Маалым болгондой, мектептин курулуш иштери 2024-жылдын июль айында башталган. Долбоор республикалык бюджеттен каржыланып, анын жалпы наркы 226 млн сомду түздү.
Жаңы мектеп заманбап талаптарга ылайык курулуп, анда окуу класстарынан тышкары лаборатория, китепкана, компьютердик класс, эмгек кабинети, ашкана, дарыгердин бөлмөсү, жыйындар жана спорт залдары каралган.
Курулуш иштеринин сапаты Турак жай-жарандык курулуш департаменти тарабынан ар бир этапта көзөмөлдөнгөн.
