Ак-Ордодо 750 орундуу жаңы мектептин курулушу аяктады
Бишкек шаарынын Ак-Ордо конушундагы №104 мектептин курулушу толугу менен аяктады. Мектептин курулушу Курулуш, архитектура жана турак жай-коммуналдык чарба министрлиги тарабынан жүргүзүлүп, учурда имаратка эмеректерди орнотуу иштери жүрүп жатат.
Курулуш министрлиги билдиргендей, үч кабаттуу мектеп 750 окуучуга ылайыкталып, заманбап панелдик типте курулган. Анда окуу класстарынан тышкары лабораториялар, компьютердик класстар, китепкана, ашкана, эмгекке үйрөтүүчү кабинеттер, медициналык жана стоматологиялык бөлмөлөр, жыйындар залы жана эл аралык стандарттарга ылайыкташтырылган спорт зал каралган.
Мектептин курулушу 2024-жылдын декабрь айында башталган. Долбоор республикалык бюджеттен каржыланып, жалпы наркы 342 миллион сомду түздү.
Белгилей кетсек, №104 мектеп Ак-Ордо конушунда жаңынан курулган үч мектептин бири болуп саналат.
