Бишкекте Эгемендүүлүк күнүнө карата төрт социалдык объект ачылды
11-сентябрда Бишкек шаарында Кыргызстандын эгемендүүлүгүнүн 35 жылдыгына карата төрт социалдык объекттин ачылыш аземи өттү. Иш-чарага президент Садыр Жапаров онлайн форматта катышты. Бул тууралуу мэриянын маалымат кызматы кабарлады.
Ачылган объектилердин бири - Шабдан Баатыр көчөсү, 740 дарегинде жайгашкан жаңы Жаш техниктер станциясы. Жалпы аянты 2 563 чарчы метр болгон беш кабаттуу имаратта окуу кабинеттеринен тышкары китепкана, музей, астрономиялык обсерватория, конференц-зал, актовый, бий жана спорт залдары жайгашкан. Ошондой эле автомодель спорту жана картинг үчүн аянтчалар, воркаут-зонасы жана практикалык сабактар үчүн жайлар уюштурулган.
Мындан тышкары, "Биримдик-Кут" жаңы конушунда 280 орундуу бала бакча пайдаланууга берилди. Эки кабаттуу имарат 12 топко ылайыкталып, анда оюн жана уктоочу бөлмөлөр, музыкалык жана спорт залдары, медициналык кабинет, ашкана жана башка зарыл бөлмөлөр каралган. Аймакта тогуз оюн аянтчасы жабдылган.
Жибек Жолу проспектиси, 281 дарегиндеги №23 орто мектептин жаңы имараты да ачылды. 700 окуучуга ылайыкталган үч кабаттуу имаратта окуу жана компьютердик класстар, лабораториялар, китепкана, медициналык блок, ашкана, актовый жана спорт залдары, ийримдер үчүн бөлмөлөр бар. Мектептин аймагында спорттук аянтчалар жана воркаут-зонасы уюштурулган.
Ал эми 5-кичи райондо №3 орто мектептин 500 окуучуга ылайыкталган кошумча окуу корпусунун курулушу аяктады. Имаратта окуу класстары, спорт жана актовый залдар, ашкана, медициналык кабинет, мугалимдер бөлмөсү, музыка жана ыр сабактары үчүн кабинеттер жайгашкан. Мектептин аймагында кичи-футбол, баскетбол жана волейбол аянтчалары, воркаут-зонасы жана 100 метрлик чуркоо жолу курулган.
Төрт объекттин тең курулушуна Бишкек шаарынын мэриясынын Капиталдык курулуш башкармалыгы тапшырыкчы болгон. Жаңы объектилер борбор калаанын билим берүү жана социалдык инфраструктурасын өнүктүрүүгө, балдар үчүн ыңгайлуу шарттарды түзүүгө багытталган.
