Чет өлкөлүк жаранга сатылган мүлктүн алдындагы жерди мамлекетке өткөрүү сунушталууда
Кыргызстанда кыймылсыз мүлктү чет өлкөлүк жарандарга сатууда жер тилкесин тариздөө тартибин өзгөртүү сунушталууда. Тиешелүү мыйзам долбоорун Жогорку Кеңештин депутаттары Дастан Бекешев жана Улугбек Ормонов иштеп чыгышкан. Документ коомдук талкууга чыгарылды.
Долбоорго ылайык, чет өлкөлүк жаранга имарат, үй же башка кыймылсыз мүлк сатылган учурда, анын алдындагы жер тилкеси сатуучу тарабынан акысыз өткөрүлүп берилиши керек.
Маалыматка караганда, эгер жер калктуу конуштун аймагында жайгашса, ал муниципалдык менчикке, ал эми калктуу конуштан тышкары болсо мамлекеттик менчикке өткөрүлөт. Мүлктү өткөрүп берүү жана жерди каттоо бир эле учурда, өз ара байланышкан бирдиктүү каттоо операциясы катары жүргүзүлөт.
Чет өлкөлүк сатып алуучу жерди менчикке албайт, аны убактылуу пайдалануу укугуна ээ болот. Алгачкы мөөнөт 20 жылды түзөт. Белгиленген талаптар сакталган учурда мөөнөт дагы 20 жылга, андан кийин акыркы жолу 10 жылга узартылышы мүмкүн. Мындан ары узартууга жол берилбейт.
Эгер кыймылсыз мүлк кийин башка чет өлкөлүк жаранга сатылса, жерди пайдалануу мөөнөтү кайрадан эсептелбейт. Жаңы ээси калган мөөнөт ичинде гана жерди пайдаланат.
Ал эми көп кабаттуу үйдөгү батир же турак эмес жай чет өлкөлүк жаранга сатылган учурда, мамлекетке же муниципалдык менчикке ошол батирге же жайга тиешелүү жер үлүшү гана өткөрүлөт. Үйдөгү башка менчик ээлеринин жалпы жердеги үлүштөрү өзгөртүлбөйт.
Мыйзам долбоорунун авторлорунун айтымында, азыркы колдонуудагы мыйзамдарда имарат чет өлкөлүк жаранга сатылгандан кийин анын алдындагы жер кимге таандык болору жана ага байланышкан укуктар кандай тартипте таризделери жетиштүү деңгээлде так көрсөтүлгөн эмес.
