Чоң-Алай районунда 3 социалдык объект пайдаланууга берилди
Кыргызстандын Эгемендүүлүгүнүн 35 жылдыгына карата өлкө боюнча онлайн форматта ачылып жаткан социалдык объекттердин катарында Чоң-Алай районунда 3 объект пайдаланууга берилди. Бул тууралуу Чоң-Алай райондук мамлекеттик администрациясы билдирди.
Алардын бири - Чоң-Алай райондук социалдык фонд башкармалыгынын жаңы имараты. Анын курулушу 2025-жылы башталып, сметалык баасы 20,9 млн сомду түздү.
Ошондой эле Дароот-Коргон айылында 50 орундуу "Жаш-Келечек" мектепке чейинки билим берүү уюму ачылды. Объекттин сметалык баасы 36,8 млн сомду түзөт.
Мындан тышкары, Кара-Мык айылында 190 орундуу маданият үйү пайдаланууга берилди. Анын сметалык баасы 28,1 млн сомду түзүп, курулуш иштери Райондук өнүктүрүү фонду тарабынан каржыланган.
Жаңы социалдык объекттер райондун тургундары үчүн шарттарды жакшыртууга, балдардын билим алуусуна жана маданий иш-чараларды өткөрүүгө мүмкүнчүлүк түзөт.
