Чүйдөгү сүт чогултуу пункттарына 44 жаңы цистерна берилди
Шопоков шаарында Чүй облусундагы сүт чогултуу пункттарына дат баспас болоттон жасалган жаңы цистерналарды өткөрүп берүү аземи өттү. Бул тууралуу Айыл чарба министрлигинин басма сөз кызматы кабарлады.
Маалым болгондой, цистерналар Дүйнөлүк банк тарабынан каржыланган "Туруктуу агрокластерлерди өнүктүрүү" долбоорунун алкагында сатылып алынган. Чүй жана Жалал-Абад облустарындагы сүт чогултуу пункттары үчүн жалпы 44 цистерна сатып алынып, алардын сыйымдуулугу 500 жана 1000 литрди түзөт.
Иш-чарада министрдин биринчи орун басары Илич Марсбек уулу сүт чогултуу пункттарын заманбап жабдуулар менен камсыздоо фермерлер үчүн маанилүү экенин белгиледи. Жаңы цистерналар сүттү талапка ылайык чогултууга, сактоого жана ташууга шарт түзүп, анын сапатын жакшыртууга багытталган.
"Туруктуу агрокластерлерди өнүктүрүү" долбоору айыл чарбасын өнүктүрүүгө, фермерлерди колдоого жана ата мекендик айыл чарба продукциясынын сапаты менен атаандаштыкка жөндөмдүүлүгүн жогорулатууга багытталган.
