Кыргызстанда дан эгиндеринин 75,6 пайызы жыйналды
Үстүбүздөгү жылы республика боюнча негизги айыл чарба өсүмдүктөрүнүн түшүмдүүлүгү өткөн жылдын ушул мезгилине салыштырмалуу жогору болуп, түшүм жыйноо иштери белгиленген графикке ылайык уланууда. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Маалыматка ылайык, өлкө боюнча 467,5 миң гектар дан эгиндери жыйналып, бул жалпы пландын 75,6 пайызын түздү. Орточо түшүмдүүлүк гектарына 27,6 центнер болуп, былтыркыга салыштырмалуу 2,8 центнерге жогорулады. Жалпы дүң түшүм 1 млн 376,6 миң тоннага жетти.
Анын ичинде 237,7 миң гектардан 761,3 миң тонна буудай, ал эми 212,6 миң гектардан 574,5 миң тонна арпа жыйналды.
Жашылча-жемиш жана картошка жыйноо иштери да уланууда. 30,7 миң гектардан 444,1 миң тонна жашылча, 22,8 миң гектардан 276,5 миң тонна картошка жыйналды. Картошканын түшүмдүүлүгү өткөн жылга салыштырмалуу гектарына 10 центнерге жогорулап, 162 центнерди түздү.
Облустар арасында дан эгиндерин жыйноо боюнча Чүй облусу алдыда. Бул аймакта 223,1 миң гектардан 696 миң тонна түшүм алынды. Ош облусунда 211,4 миң тонна, Жалал-Абад облусунда 141,6 миң тонна дан эгиндери жыйналды. Баткен, Талас, Нарын жана Ысык-Көл облустарында да түшүм жыйноо иштери улантылууда.
