"Кытай - Кыргызстан - Өзбекстан" темир жолунда биринчи тоннелдин өтмөгү аяктады
"Кытай - Кыргызстан - Өзбекстан" темир жолунун курулушунун алкагында узундугу 209,6 метр болгон Кош-Дөбө №2 тоннелинин өтмөгү аяктады. Ал темир жол багытында өтмөгү толук аяктаган биринчи тоннель болду. Бул тууралуу "Кыргыз темир жолу" ишканасынан билдиришти.
Маалыматка караганда, учурда темир жол линиясындагы 28 тоннелде курулуш иштери жүрүп жатат. Долбоордо жалпы узундугу 104,084 чакырымды түзгөн 29 тоннель куруу каралган.
Кош-Дөбө №2 тоннелинин өтмөгүнүн аякташы долбоорду ишке ашыруудагы маанилүү этап болуп, татаал тоолуу рельефтеги курулуш иштеринин алдыга жылганын көрсөтөт. Тоннелдерди курууда заманбап технологиялар жана инженердик чечимдер колдонулуп, коопсуздук талаптары сакталууда.
