Ошто 142 млн сомдук заманбап оорукана курулду
Ош облусунун Ноокат районундагы Жаңы-Базар айылында 40 койкалуу заманбап оорукана курулду. Бул тууралуу Курулуш министрлигинен билдиришти.
Долбоор министрлик тарабынан республикалык бюджеттин эсебинен ишке ашырылып, жалпы наркы 142 миллион сомду түздү.
Жалпы аянты 2400 чарчы метрди түзгөн үч кабаттуу имаратта терапия, хирургия жана төрөт бөлүмдөрү жайгашат. Ошондой эле оорукананын жанына поликлиника имараты курулуп, анда рентген, стоматология, УЗИ жана кабыл алуу бөлмөлөрү каралган.
Курулуш иштери 2023-жылдын сентябрь айында башталып, учурда толугу менен аяктады. Азыр медициналык жабдууларды жана эмеректерди орнотуу иштери жүргүзүлүүдө. Долбоор аймактагы медициналык инфраструктураны жакшыртып, жергиликтүү тургундарга сапаттуу медициналык жардам көрсөтүүгө шарт түзүүгө багытталган.
