Президент Садыр Жапаров Таласта Мамлекеттик туу көтөрүү аземине катышты
Өлкө башчы Садыр Жапаров бүгүн Талас шаарынын борбордук аянтында өткөн Мамлекеттик туу көтөрүү салтанатына катышты. Иш-чара Кыргызстандын Эгемендүүлүгүнүн 35 жылдыгына арналды. Бул тууралуу президенттин администрациясынан кабарлашты.
Аземде Улуттук гвардиянын колбашчысы Мамлекет башчысына рапорт берди. Мамлекеттик гимн жаңырып, Кыргыз Республикасынын Мамлекеттик туусу көтөрүлдү.
Өз сөзүндө президент Садыр Жапаров Мамлекеттик туу – эл-жер үчүн канын-жанын арнаган ата-бабалардын изи, кайрат-күчү, деми туюнтулган мамлекеттик туубуз элибиздин сыймыгы, журтубуздун биримдиги, мамлекетибиздин тарыхы, ата-бабалардан калган аманат жана кийинки муунга өткөрүп берүүчү эң ыйык таберик экенине токтолду.
"Ошондуктан күн нуру чайып, түндүгүнө ата-бабалардын руху оролгон Туубуз көтөрүлгөндө ар бир кыргыз жаранынын жүрөгү туйлап, "Бул – менин Мекеним! Бул – менин аманатым" деп, бабаларыбыздан калган жерди, элди, тилди, нарк-насилди сактап, кийинки муунга өткөрүп берүү жоопкерчилиги кулагында жаңырып турушу керек", - деди президент.
Мамлекет башчысы өлкөнү бекемдөөнүн негизги шарттары катары элдин биримдигин жана биргелешкен эмгекти атады. Ал эгемендүүлүктүн 35 жылында Кыргызстан түрдүү сыноолорду баштан кечиргенин белгилеп, өткөндөн сабак алып, улуттук баалуулуктарды сактоо менен өнүккөн Кыргызстанды куруу зарылдыгын айтты.
Президент сөзүнүн соңунда элди биримдикти сактоого, эгемендүүлүктү коргоого жана өз эмгеги менен Мекенге болгон сүйүүсүн көрсөтүүгө чакырды.
