Президент Таластагы жаңы стадиондун курулушун текшерди
Мамлекет башчысы Садыр Жапаров бүгүн Талас облусуна болгон иш сапарынын алкагында Талас шаарындагы жаңы борбордук стадиондун курулушунун жүрүшү менен таанышты. Бул тууралуу президенттин администрациясынан билдиришти.
Курулуш, архитектура жана турак жай-коммуналдык чарба министри Нурдан Орунтаев өлкө башчысына объекттин негизги көрсөткүчтөрү жана учурдагы курулуш иштери тууралуу маалымат берди. Жаңы көп функционалдуу спорт комплекси 5 миңден ашуун көрүүчүгө ылайыкталат.
Стадион ишке киргенден кийин футбол, жеңил атлетика жана башка спорт түрлөрү боюнча машыгууларды жана мелдештерди өткөрүүгө, ошондой эле республикалык жана эл аралык деңгээлдеги ири маданий-массалык иш-чараларды уюштурууга шарт түзүлөт.
Садыр Жапаров аймактарда спортту өнүктүрүүгө шарт түзүү мамлекеттик саясаттын маанилүү багыттарынын бири экенин белгилеп, стадиондун облус тургундары үчүн социалдык мааниси жогору экенин айтты. Президент курулуш иштеринин сапатын камсыз кылып, спорт комплексин белгиленген мөөнөттө пайдаланууга берүүнү тапшырды.
