Таласта "Акылман" лицейи ачылды
Президент Садыр Жапаров бүгүн Талас облусуна болгон иш сапарынын алкагында Талас шаарындагы "Акылман" лицейинин ачылышына катышты. Ошондой эле онлайн форматта Кыргызстан боюнча 100 социалдык объектти ишке киргизди.
Президенттик администрация билдиргендей, мамлекет башчысы лицейдин ачылышында билимдүү, мекенчил жана татыктуу жаштар эгемен Кыргызстандын негизги күчү экенин белгилеп, окуучуларды заманбап билим алуу менен катар улуттук баалуулуктарды жана мекенчилдикти айкалыштырууга чакырды.
"Акылман" лицейинин комплексинде окуу корпусу, жатакана, футбол талаасы, жеңил атлетика, баскетбол жана волейбол аянтчалары, воркаут аянты бар. Окуу корпусунда 19 кабинет, 4 лаборатория, китепкана, ашкана, спорт зал жана 300 орундуу конференц-зал жайгашкан.
Президенттин айтымында, лицейдин курулушу мамлекет менен меценаттардын биргелешкен аракетинин натыйжасы. Ал окуу жайдан келечекте өлкөнүн сыймыгы боло турган адистер чыгарына ишеним билдирди.
Мындан тышкары, Эгемендүүлүк күнүнө карата өлкө боюнча 34 мектеп, 28 бала бакча, 12 спорттук имарат, 9 саламаттык сактоо мекемеси, 9 маданий жана 11 административдик объект, ошондой эле башка багыттагы 2 объект пайдаланууга берилди.
