Ысык-Көлдө кайра иштетүү ишканаларынын иши текшерилди
Суу ресурстары, айыл чарба жана кайра иштетүү өнөр жайы министринин орун басары Рысгүл Акимжанова Ысык-Көл облусуна болгон иш сапарында айыл чарба продукциясын өндүргөн жана кайра иштеткен ишканалардын ишмердүүлүгү менен таанышты. Бул тууралуу министрликтин маалымат кызматы кабарлады.
Маалыматка ылайык, Балыкчы шаарындагы "Оберон" ишканасында жашылча-жемиштерди сактоого арналган 12 камера бар. Аянты 1500 чарчы метр болгон кампа 2400 тоннага чейин продукция сактоого ылайыкталган. Ишкана келечекте балдар үчүн тамак-аш өндүрүүчү завод курууну пландап жатат.
Ананьево айылындагы "Агрохолдинг Сазановка" ишканасы жергиликтүү тургундардан алма жана алмурут сатып алып, табигый ширелерди чыгарат. Ал эми Түп районундагы "Сүт Булак" ишканасында күнүнө 18 тоннага чейин сүт кайра иштетилип, сырдын 14 түрү өндүрүлөт.
Иш сапардын жыйынтыгында Рысгүл Акимжанова айыл чарба продукциясын кайра иштетүүнүн көлөмүн көбөйтүү, жаңы өндүрүштөрдү ачуу жана ишкерлер менен кызматташууну күчөтүү маанилүү экенин белгиледи.
