Эгемендүүлүктүн 36 жылдыгы Нарын облусунда белгиленет
Кыргызстандын Эгемендүүлүгүнүн 36 жылдыгы келерки жылы Нарын облусунда белгиленет. Бул тууралуу президент Садыр Жапаров Таласта Эгемендүүлүктүн 35 жылдыгына арналган жыйынтыктоочу иш-чарада билдирди.
Мамлекет башчысынын катышуусунда Талас шаарында Эгемендүүлүктүн 35 жылдыгына арналган масштабдуу майрамдык иш-чара өттү. Анын алкагында "Тарых изи: жаралуудан келечекке" аттуу театралдаштырылган көрсөтүү тартууланды.
Көрсөтүүдө кыргыз элинин байыркы доордон тартып Манас мезгилине, Үркүнгө, советтик доорго, эгемендүүлүктүн алгачкы жылдарына жана азыркы Кыргызстанга чейинки тарыхы чагылдырылды.
Иш-чаранын жүрүшүндө Садыр Жапаров өлкөнүн 35 жылдык эгемендүүлүк жолуна токтолуп, мындан аркы өнүгүүнүн негизги багыттарын белгиледи. Алардын катарында экономикалык өсүш, инфраструктураны өнүктүрүү, улуттук биримдикти бекемдөө жана адамдык потенциалды чыңдоо милдеттери айтылды.
Майрамдык иш-чара концерттик программа жана 1500 дрондун катышуусунда масштабдуу жарык шоусу менен уланды.
