Шекер айылында “Айтматов ааламы” маданий-мемориалдык комплекси ачылды
Президент Садыр Жапаров бүгүн Талас облусунун Айтматов районундагы Шекер айылында “Айтматов ааламы” маданий-мемориалдык комплексинин ачылыш аземине катышты. Мемориалдык комплекс дүйнөлүк адабияттын классиги, кыргыздын улуу жазуучусу Чыңгыз Айтматовдун өмүрү жана чыгармачылыгы менен тааныштыруу, анын руханий мурасын сактоо жана кийинки муундарга жеткирүү максатында түзүлгөн.
Ачылыш аземинде сөз сүйлөгөн Садыр Жапаров “Айтматов ааламы” жөн гана музей болбостон, маданияттын, илимдин, агартуунун жана руханий тарбиянын борбору болушу керектигин белгиледи.
“Биздин максат – Айтматов агабыздын мурасын адеми курулган имараттын ичинде эле сактап калуу эмес, аны кийинки муундун аң-сезимине терең сиңирүү болуп саналат. Анткени Айтматов – адам баласын табият менен гармонияда жашоого чакырган, ар кыл маданияттар менен диндердин карама-каршылыгын эмес, алардын өз ара түшүнүүсүн жана диалогун жактаган, келечек үчүн коңгуроо каккан жалпы адамзаттык деңгээлдеги нравалык лидер!”, - деп белгиледи Мамлекет башчысы.
Комплексте ошондой эле маданий жана коомдук иш-чараларды өткөрүүгө арналган амфитеатр, улуттук маданиятты чагылдырган боз үйлөрдү тигүү үчүн аянтчалар жана туристтердин эс алуусу менен тейлөөсүнө керектүү инфраструктура каралган.
Мындан тышкары, комплекс жергиликтүү экономикага да таасир берет. Расмий маалыматта жаңы жумуш орундарын түзүү, туризм тармагында жергиликтүү тургундардын киреше табуу мүмкүнчүлүктөрүн кеңейтүү жана чакан жана орто бизнести өнүктүрүү максаттары белгиленген.
Музейге келгендер Айтматовдун чыгармачылыгы менен таанышып, адабий жана маданий иш-чараларга катыша алышат. Ошондой эле Шекер айылынын тарыхый-маданий мурасы тууралуу маалымат алуу мүмкүнчүлүгү түзүлөт.
Ачылыш аземинин жүрүшүндө президент Садыр Жапаров Чыңгыз Айтматовдун эстелигине гүл коюп, комплекс менен таанышты. Анда жазуучунун чыгармаларынан үзүндүлөр театралдаштырылып көрсөтүлдү.
