Кыргызстан менен Корея бир катар эки тараптуу документке кол койду
Өлкө башчысы Садыр Жапаровдун Корея Республикасына расмий сапарынын жыйынтыгында кыргыз-корей кызматташтыгын кеңейтүүгө багытталган бир катар документтерге кол коюлду. Бул тууралуу президенттин администрациясы билдирди.
Маалыматка ылайык, документтер соода-экономикалык жана инвестициялык кызматташтык, бажы иши, билим берүү, маданият, энергетика, спорт, эмгек миграциясы, шаарларды жана инфраструктураны өнүктүрүү, өзгөчө кырдаалдарды башкаруу жана токой чарбасы сыяктуу багыттарды камтыйт.
Мындан тышкары, Улуттук инвестициялар агенттиги Кореянын инфраструктураны жана шаарларды өнүктүрүү корпорациясы жана соода-инвестицияларды илгерилетүү агенттиги менен өз ара түшүнүшүү меморандумдарына кол койду.
Ошондой эле Бишкек менен Сеул шаарларынын ортосунда боордоштук байланыштарды орнотуу боюнча меморандум түзүлдү. Интеллектуалдык менчик, халал индустриясы, мал чарбачылыгы технологиялары жана жумушка уруксат берүү системасы боюнча да кызматташуу макулдашылды.
Мындан сырткары, "Борбордук Азия - Корея Республикасы" биринчи саммитинин жыйынтыгында өнөр жай жана жеткирүү чынжырлары боюнча меморандумга, ошондой эле жасалма интеллект, илим-технология, климат, энергетикалык өтүү жана абанын сапаты боюнча эки демилгеге макулдук берилди.
