Кыргызстанда товарларга байкоо жүргүзүү системасы ишке кирди
1-сентябрдан тартып Кыргызстанда товарларга байкоо жүргүзүү системасы өнөр жайлык эксплуатацияга киргизилди. Бул тууралуу Мамлекеттик салык кызматы билдирди.
Аталган система салыктык башкарууну санариптештирүү жана Кыргызстандын Евразия экономикалык биримдигинин алкагындагы эл аралык милдеттенмелерин аткаруу максатында ишке киргизилди. Негизги өзгөрүүлөрдүн бири - мунай жана мунай заттарынан башка бардык товарлардын категориялары боюнча электрондук товардык-транспорттук коштомо кагазды (ЭТТК) милдеттүү колдонуу талабынын жоюлушу. Мунай жана мунай заттарына карата ЭТТКны колдонуу боюнча мурдагы тартип сакталат.
Айрым товарлар боюнча ЭТТКнын функциялары "Электрондук эсеп-фактура 2.0" (ЭЭФ 2.0) модулу аркылуу ишке ашырылат. Ал товарлардын жүгүртүлүшүн электрондук түрдө тариздөөгө, алардын кыймылын эсепке алууга жана көзөмөлдөөгө мүмкүнчүлүк берет. Мында ЭЭФ 2.0 салыктык милдеттенмелерди эсептөө жана аткаруу тартибин өзгөртпөйт.
Салык кызматы билдиргендей, байкоо жүргүзүү механизми тиешелүү эсепке алуу жана көзөмөлдөө тартиби мыйзамдарда жана эл аралык милдеттенмелерде каралган товарларга гана колдонулат. Анын ичинде Евразия экономикалык бирлигинин бажы аймагына алып келинген айрым товарлар бар. Алардын катарына муздаткычтар жана тоңдургучтар, кир жуучу машиналар, телевизорлор, ошондой эле теле-, видео жана башка тиричилик техникаларынын айрым түрлөрү кирет.
Ошондой эле виртуалдык калдыктарды иш жүзүндөгү калдыктарга шайкеш келтирүү талабы негизги каражат катары сатып алынган жана кийин кайра сатууга арналбаган товарларга карата колдонулбайт.
Мамлекеттик салык кызматы ишкерлерге системаны колдонууга даярдык көрүү үчүн сатылып жаткан жана пайдаланылып жаткан товарларды Салык кызматынын товарлар каталогуна киргизүүнү сунуштады. Импорттоочулар жана ата мекендик өндүрүүчүлөр каталогдогу маалыматтардын толуктугуна жана тууралыгына өзгөчө көңүл буруусу керек. Анткени товарлар тууралуу маалыматтардын актуалдуулугу электрондук документтерди туура түзүүнүн жана байкоо жүргүзүү системасынын натыйжалуу иштешинин маанилүү шарттарынын бири болуп саналат.
