Эми уйдун сөөгү менен этинин баасы 770 сомдон ашпайт
Кыргызстанда эттин баасын туруктуу кармоо максатында уй жана кой этине максималдуу баалар белгиленди. Баалар малды багуудан тартып, продукцияны базарга жеткирүүгө чейинки чыгымдар талдангандан кийин аныкталган. Бул тууралуу Айыл чарба министрлиги билдирди.
Маалымдалгандай, Бишкек шаарында уйдун сөөгү менен этинин дүң баасы 700 сом, чекене баасы 770 сом, сулп этинин баасы 870 сом деп белгиленди. Кой этинин дүң баасы 820 сом, чекене баасы 880 сомду түзөт.
Аймактарда уйдун сөөгү менен этинин чекене баасы 750–775 сом, ал эми сулп эти 840–880 сом аралыгында белгиленди. Кой этинин чекене баасы облустарга жараша 840–880 сом болуп бекитилди.
Тактап айтканда, Чүйдө уйдун сөөгү менен эти 770 сом, Нарын жана Ошто 750 сом, Ысык-Көл, Талас жана Жалал-Абадда 770 сом, Баткенде 775 сомдон сатылат. Сулп эттин баасы Нарын облусунда 840 сомдон башталып, Баткенде 880 сомго чейин жетет.
Мындан тышкары, курамында 80% эт жана 20% май бар А категориясындагы, ошондой эле 60% эт жана 40% майдан турган Б категориясындагы фаршка да туруктуу баалар бекитилди.
Жогорудагы маалымат жарыялангандан кийин, монополияга каршы жөнгө салуу кызматы, көрсөтүлгөн баалар бекитилген же милдеттүү баа болуп саналбайт - деп билдирди. Маалымыматка караганда, Монополияга каршы жөнгө салуу кызматы тарабынан рыноктогу баа туруктуулугун камсыз кылуу жана эттин баасынын негизсиз өсүшүнө жол бербөө максатында гана сунушталган максималдуу баалар болуп саналат.
