Садыр Жапаров Кореянын премьер-министри менен сүйлөшүүлөрдү өткөрдү
Мамлекет башчысы Садыр Жапаров бүгүн Сеул шаарында Корея Республикасынын премьер-министри Хан Сон Сук менен сүйлөшүүлөрдү өткөрдү. Бул тууралуу президенттин администрациясы билдирди.
Жолугушууда кыргыз-корей кызматташтыгын кеңейтүү, соода-экономикалык байланыштарды өнүктүрүү, инвестиция тартуу жана биргелешкен долбоорлорду ишке ашыруу маселелери талкууланды.Тараптар санариптештирүү жана жасалма интеллект, туризм, инвестиция жана өнөр жай кооперациясы багыттарындагы кызматташтыктын келечегине токтолушту.
Хан Сон Сук Кореянын технологиялык мүмкүнчүлүктөрү менен Кыргызстандын жаратылыш ресурстарын айкалыштырып, өз ара пайдалуу долбоорлорду ишке ашырууга кеңири мүмкүнчүлүк бар экенин белгиледи. Ошондой эле Кореядан Кыргызстанга келген туристтердин саны өсүп жатканын айтып, түз авиакаттамдын маанисине токтолду.
Өз кезегинде Садыр Жапаров Кыргызстан Корея менен кызматташтыкты мындан ары өнүктүрүүгө жана корей бизнесинин өлкөдөгү катышуусун кеңейтүүгө кызыкдар экенин билдирди.
"Биз айрым инвестициялык долбоорлорду гана ишке ашырууга эмес, корей бизнесинин Кыргызстанда кеңири жана узак мөөнөттүү катышуусуна кызыкдарбыз. Өнөр жай кооперациясын өнүктүрүүгө, биргелешкен өндүрүштөрдү түзүүгө жана өндүрүштү локалдаштырууга өзгөчө көңүл бурабыз", - деди өлкө башчысы.
Президент корей компанияларын автомобиль куруу, фармацевтика, текстиль өнөр жайы, электроника жана башка келечектүү тармактардагы долбоорлорго катышууга чакырды. Ошондой эле өкмөттөргө артыкчылыктуу инвестициялык долбоорлорду аныктап, аларды ишке ашыруунун бардык баскычтарында коштоону камсыз кылууну сунуштады.
Мындан тышкары, Кореяда иштеп жаткан кыргызстандыктардын пенсиялык камсыздоо маселеси көтөрүлдү. Садыр Жапаров эки өлкөнүн өкмөттөрүнүн ортосунда пенсиялык камсыздоо боюнча келишимди иштеп чыгуу боюнча сүйлөшүүлөрдү тездетүүнү сунуштады. Тараптар жетишилген макулдашууларды ишке ашыруу боюнча кызматташтыкты улантууга даяр экенин билдиришти.
