Медициналык кызматтар санариптештирилүүдө
Кыргызстанда медициналык кызматтарды санариптештирүү боюнча иштер жүрүп жатат. Бул тууралуу Саламаттык сактоо министрлиги билдирди.
Министрдин орун басары Нурбек Букуев Бишкектеги үй-бүлөлүк медицина борборлорунда санариптештирүү иштеринин жүрүшү менен жеринен таанышты.
Маалымдалгандай, "Өкмөттүк акселераторлор" программасынын алкагында айдоочулук күбөлүк алуу үчүн керектелүүчү 083/у маалымкаты, аскердик-медициналык комиссиянын документтери, балдар жана окуучулар үчүн 095/у жана 026/у маалымкаттары, ошондой эле электрондук санитардык китепче санарип форматка өткөрүлүүдө.
Долбоордун негизги принциби - "Маалымат бир жолу берилет". Башкача айтканда, жаран тууралуу керектүү маалымат мамлекеттик маалыматтык системада болсо, аны кайрадан кагаз түрүндө чогултуп тапшыруунун зарылдыгы болбойт.
Министрликтин маалыматына ылайык, "Sanarip Clinic" медициналык маалыматтарды түзүү жана иштетүүнү камсыздаса, "Түндүк" системасы аркылуу жарандар санариптик мамлекеттик кызматтардан пайдалана алышат.
Бул иштер медициналык кызматтарды алууда жарандардын убактысын үнөмдөп, кагаз иштерин жана административдик жүктү азайтууга багытталган.
