Ошто муниципалдык жер тилкелери аукционго коюлат
Ош шаарында муниципалдык жер тилкелери убактылуу ижарага берүү үчүн аукционго коюлат. Бул тууралуу мэриядан билдиришти.
Маалыматка ылайык, аукционго катышуу үчүн жеке жактар паспортунун көчүрмөсүн, ал эми юридикалык жактар тиешелүү уюштуруу документтерин, өкүлүнүн паспортун жана ишеним катын тапшырышы керек.
Ошондой эле старттык баанын 10 пайызы өлчөмүндө кепилдик төлөм жана лоттун старттык баасынын 0,5 пайызы өлчөмүндө комиссиялык жыйым төлөнгөнүн тастыктаган документ талап кылынат.
Аукционго катышуу жөнүндө арызда лоттун номери көрсөтүлүшү зарыл. Аукцион Ош мэриясынын расмий сайтына кулактандыруу жарыяланган күндөн тартып 30 күн өткөндөн кийин өткөрүлөт.
Аукционго физикалык жана юридикалык жактар, анын ичинде белгиленген мөөнөттө арыз бергендер катыша алат. Катышуучулар Ош шаарынын мэриясынын муниципалдык менчик башкармалыгына, Заднепровский көчөсү №4 дарегине кайрыла алышат.
