Садыр Жапаров Сеулдагы Кыргызстандын элчилигине барды
Өлкө башчысы Садыр Жапаров бүгүн Корея Республикасына расмий сапарынын алкагында Кыргызстандын Сеулдагы элчилигине барды. Бул тууралуу президенттин администрациясы билдирди.
Жапаров дипломатиялык өкүлчүлүктүн ишмердүүлүгү менен таанышып, иш бөлмөлөрүн, консулдук бөлүмдү жана сүйлөшүүлөр өтүүчү залдарды көрүп чыкты.
Кыргызстандын Сеулдагы дипломатиялык өкүлчүлүгү 2006-жылы консулдук катары ачылып, 2008-жылы элчилик болуп кайра түзүлгөн. Буга чейин элчилик имаратты ижарага алып келген.
2025-жылдын апрелинде Сеулдун борборунан Кыргызстандын дипломатиялык өкүлчүлүгү үчүн өз имараты сатып алынган. Президенттин айтымында, бул бюджеттик каражаттарды үнөмдөөгө жана жарандарды кабыл алуу үчүн ыңгайлуу шарттарды түзүүгө мүмкүндүк берди.
Садыр Жапаров мындай тажрыйбаны башка өлкөлөрдөгү Кыргызстандын дипломатиялык өкүлчүлүктөрүндө да колдонуу зарылдыгын белгиледи.
