Башкы прокуратуранын делегациясы Минск шаарында МСПКнын XI жыйынына катышты
17-сентябрда Минск шаарында КМШга катышкан мамлекеттердин Коррупцияга каршы аракеттенүү боюнча мамлекеттер аралык кеңешинин (МСПК) XI жыйыны болуп өттү. Аталган жыйынга Башкы прокурорунун орун басары Замир Акназаров баштаган делегация катышты.
Башкы прокуратура билдиргендей, жыйындын жүрүшүндө коррупцияга каршы күрөшүүнүн актуалдуу маселелери, анын алдын алуу чараларын өркүндөтүү, санариптик чечимдерди киргизүү, коррупцияга каршы саясатты координациялоо жана өз ара тажрыйба алмашуу маселелери талкууланды.
Иш сапардын алкагында Башкы прокурордун орун басары Акназаров Беларусь Республикасынын Башкы прокурору Дмитрий Гора менен эки тараптуу жолугушуу өткөрдү.
Тараптар кибер-алдамчылыкка байланышкан кылмыш иштери боюнча эл аралык-укуктук кызматташууну талкуулап, коррупцияга каршы аракеттенүү жана айлана-чөйрөнү коргоо мыйзамдарынын сакталышына прокурордук көзөмөл жүргүзүү жаатында практикалык тажрыйба алмашуунун зарылдыгын белгилешти.
Мындан тышкары, делегациянын өкүлү Беларусь мамлекеттик экономикалык университетинде лекция окуп, Кыргызстандын коррупцияга каршы аракеттенүү жаатындагы заманбап ыкмалары тууралуу маалымат берди. Жыйындын жыйынтыгында КМШ мейкиндигинде коррупцияга каршы кызматташтыкты мындан ары чыңдоого багытталган бир катар чаралар белгиленди.
