Казанда КМШ жана ШКУ мамлекеттеринин башкы аскер прокурорлору жолугушту
Орусиянын Казань шаарында КМШ жана ШКУ мамлекеттеринин башкы аскер прокурорлорунун жолугушуулары өттү. Бул тууралуу Башкы прокуратурадан билдиришти.
Маалымдалгандай, жыйын КМШ башкы прокурорлорунун Координациялык кеңешинин жана ШКУ башкы прокурорлорунун жыйындарынын алкагында уюштурулду.
Кыргызстандын атынан Башкы прокурордун орун басары - Аскер прокурор Кубанычбек Байдылдаев катышты.
Жолугушуунун негизги темасы - чек ара коопсуздугун прокурордук көзөмөл менен камсыз кылуу. Катышуучулар чек арага жакын аймактарда укук бузуулардын алдын алуу, контрабандага, курал-жарактын жана баңгизаттын мыйзамсыз жүгүртүлүшүнө каршы күрөшүү маселелерин талкуулады.
КМШ өкүлдөрүнүн жолугушуусунун жыйынтыгында Биргелешкен билдирүү кабыл алынды. Ал эми ШКУ алкагындагы жолугушуу Протокол менен бекитилди.
Ошондой эле Байдылдаев Орусиянын Башкы аскер прокурору В. Петров жана Кытай армиясынын Аскер прокурору Сунь Сюцзюнь менен эки тараптуу жолугушууларды өткөрдү.
