"Жылдын мыкты тарбиячысы - 2026" сынагын 4 педагог жеңди
"Жылдын мыкты тарбиячысы - 2026” республикалык сынагынын 4 номинациясы боюнча жеңүүчүлөрү аныкталды. Бул тууралуу Билим берүү жана илим министрлиги билдирди.
Маалымдалгандай, бүгүн билим берүү кызматкерлеринин күнүнө арналган салтанаттуу иш-чаранын алкагында сынактын жеңүүчүлөрү сыйланды. Министрлер кабинетинин төрагасы Адылбек Касымалиев аларга президенттин фондунан 500 миң сомдон акчалай сыйлык тапшырды.
Номинациялар боюнча жеңүүчүлөр томөнкүлөр болушту:
- Жылдын мыкты тарбиячысы - Сарбаева Зарена Акылбековна, Ысык-Көл облусунун Балыкчы шаарындагы "Чолпон" мектепке чейинки билим берүү уюмунун тарбиячысы.
- Жылдын мыкты методисти - Үсөн кызы Нуркыз, Бишкек шаарынын Ленин районундагы № 21 "Баластан" мектепке чейинки билим берүү уюмунун усулчусу.
- Жылдын мыкты мамлекеттик тил мугалими - Усарова Асилай Абдикеримовна, Баткен облусунун Раззаков шаарындагы № 1 "Барчын" мектепке чейинки билим берүү уюмунун мамлекеттик тил мугалими.
- Жылдын мыкты музыкалык жетекчиси - Өмүркулов Нурболот Өмүркулович, Бишкек шаарынын Ленин районундагы № 118 "Баластан" мектепке чейинки билим берүү уюмунун музыкалык жетекчиси.
