Жарандар Дастан Бекешовдон жардам сурап кайрылышты
Жогорку Кеңештин депутаты Дастан Бекешов жарандарды кабыл алуу учурунда көтөрүлгөн бир катар маселелер тууралуу социалдык тармактагы баракчасына бөлүштү.
Анын маалыматына караганда, “Мадина” базарындагы өрттөн жабыркаган соодагерлер иштеген жеринен ажырап, насыялык милдеттенмелер менен калганын айтышкан. Алар төлөмдөрдү кийинкиге жылдырууну, көчүүгө кеткен чыгымдарды компенсациялоону жана өрт үчүн жооптууларды жоопкерчиликке тартууну суранышкан.
Ал эми Көк-Жар айылынын тургундары жеке үйлөрдүн арасына көп кабаттуу үйлөрдүн курулуп жатканына нааразы болушкан. Депутаттын айтымында, жашоочулар буга чейин прокуратурага кайрылып, соттук териштирүүлөргө да катышкан, бирок маселе чечилбей келет.
Дагы бир жаран жер мунапысына байланыштуу башка адамдар талашып жаткан жер тилкесин коргоп берүү маселеси менен кайрылган.
Мындан тышкары, Enactus уюмунун жаштары автоунаа жуучу жайларда колдонулган сууну тазалап, кайра пайдалануу долбоорун сунушташкан. Бекешов суу үнөмдөөгө байланыштуу мыйзамдык талаптар мындай демилгелерди колдоого жардам берерин белгиледи.
Депутат жогорудагы кайрылуулардын ар бири боюнча маселелерди карап чыгып, тиешелүү чечимдерге жетишүүгө аракет кыларын билдирүүдө.
