Бишкекте 15 батирлүү көйгөйлүү үй мыйзамдаштырылды
Бишкекте көйгөйлүү көп кабаттуу үйлөрдү мыйзамдаштыруу боюнча системалуу иштер уланууда. Бул алкакта Миң-Куш көчөсү 21 дарегиндеги 15 батирлүү үйдүн маселеси чечилди. Бул тууралуу Курулуш министрлиги кабарлады.
Маалымдалгандай, 8-октябрда министрликке караштуу Мамлекеттик архитектура-курулуш контролдоо департаментинин директору Марат Акназаров жана Бишкек шаардык башкармалыгынын башчысы Мирлан Шайымкулов тургундар менен жолугуп, объектини пайдаланууга берүү боюнча шайкештик актысын тапшырды.
Департамент башчысы тургундарды куттуктап, иштер президенттин тапшырмасына ылайык көйгөйлүү курулуштарды жөнгө салуу жана жарандардын укугун камсыз кылуу максатында жүрүп жатканын белгиледи.
Аталган үйдү Тилекпаев И.Б. жана Мирланов Т.М. куруп баштаган. Курулуш өз убагында бүтпөй калгандыктан, жашоочулар батирлерин каттай албай, документ алууда кыйынчылыктарга туш болуп келген.
