Манаста 166 млн сомдук жаңы мектеп курулду
Манас шаарынын Дөмөр айылында 275 орундуу заманбап мектептин курулушу аяктады. Бул тууралуу Курулуш министрлиги билдирди.
Маалыматка караганда, долбоор республикалык бюджеттин эсебинен каржыланып, жалпы наркы 166 миллион сомду түздү. Курулушту министрликке караштуу Турак жай-жарандык курулуш департаменти көзөмөлдөгөн.
Эки кабаттуу мектептин жалпы аянты 2 980 чарчы метр. Имаратта заманбап окуу класстары, лаборатория, китепкана, ашкана, жыйындар залы, компьютердик класс жана спорт зал каралган.
Курулуш 2025-жылдын апрелинде башталган. Учурда иштер толук аяктап, мектепти жакынкы күндөрү пайдаланууга берүү пландалууда.
