Баткенде 10 миң кишилик стадиондун курулушу 80 пайыз аяктады
Баткен шаарындагы 10 миң кишиге ылайыкталган стадиондун курулушу 80 пайыз аяктады. Бул тууралуу 22-октябрда Баткен облустук өкүлчүлүктөн билдиришти.
Билдирүүгө караганда, КРнын президентинин Баткен облусундагы өкүлүнүн биринчи орун басары Бактыбек Токсонбаев бүгүн стадиондун курулушунан кабар алды.
Токсонбаев анда курулушутун сапатын дыкат көзөмөлдөө жана өз убагында бүткөрүү боюнча жетекчилерге тапшырмаларды берди.
Объекттин курулушу 80 пайыз аяктаган. Жыл аягына пайдаланууга берүү пландалууда. 10 гектар аянтты ээлеген объектте футбол аренасынан сырткары үч машыгуу оюн талаалары жана төрт кичи футбол аянтчалары камтылган. Ал жарык берүүчү шам чырактар менен жабдылып, футболдук беттештерди кечки убакытта кабыл алууга да шарт түзүлөт.
Стадиондун аймагында профессионал футболчуларды жана жаш оюнчуларды кабыл ала турган 100 кишилик жатакана комплекси да курулууда.
Мындан сырткары 200 унаага ылайыкталган унаа токтотуучу жай орун алат.
