Өлкөдө 52 юридикалык жак ишин токтотту
21-октябрда президенттин санкциялык саясат боюнча атайын өкүлү Бакыт Сыдыков чет мамлекеттердин дипломатиялык өкүлчүлүктөрүнүн башчылары менен жолукту. Бул тууралуу Экономика жана коммерция министрлиги билдирди.
Брифингдин жүрүшүндө эл аралык өнөктөштөргө санкциялык тобокелдиктердин алдын алуу боюнча жүргүзүлүп жаткан иштер тууралуу маалымат берилди.
Маалыматка ылайык, 52 юридикалык жак ишин токтотуп, 57 юридикалык жакка карата мажбурлап жоюу жол-жоболору башталган. Дагы 25 юридикалык жакка карата текшерүүлөр жүргүзүлүүдө.
Мындан тышкары, мамлекеттик банктар 240тан ашык эсепти тейлөөнү токтотуу жөнүндө чечим кабыл алышкан. Санкциялык комплаенс системаларына көз карандысыз баа берүү үчүн эл аралык Kroll консалтингдик компаниясы тартылууда.
Жолугушууда экспорттук көзөмөлдү өркүндөтүү, виртуалдык активдер чөйрөсүндөгү көзөмөлдү күчөтүү жана эл аралык өнөктөштөр менен маалымат алмашуу маселелери да талкууланды.
