Тоолуу ашууларда кар жаап, жолдорго кум-туз себилди
Бүгүн таңга маал Бишкек - Ош унаа жолунун 125–139-чакырымдарында кар жаады. Бул тууралуу Транспорт министрлигинен билдиришти.
Маалымдалгандай, №9 Жол тейлөө мекемесинин кызматкерлери жолго кум-туз аралашмасын себишти. Учурда кар токтоп, жол ачык жана унаалардын каттамы үзгүлтүксүз жүрүүдө.
Ошондой эле Ош - Сары-Таш - Эркештам унаа жолундагы Талдык жана Тонмурун ашууларында кар жаап жатат. Жол тейлөө кызматкерлери тайгактыктын алдын алуу үчүн жолго атайын материалдарды себүүдө. Ашууларда унаа кыймылына чектөө киргизилген жок.
Министрлик айдоочуларды жолдо этият болууга, унааларынын техникалык абалын текшерүүгө жана жайкы дөңгөлөктөрүн кышкысына алмаштырууга чакырды.
