Ноокенде аңчылык эрежелерин бузган жаранга 12 500 сом айып салынды
Ноокен районунун Шайдан участкасынан тиешелүү уруксат берүүчү документтери жок ок атуучу куралды автоунаасында алып жүргөн жаран аныкталды. Бул тууралуу Жаратылыш министрлигинин басма сөз кызматынан билдирди.
Аталган факты боюнча жеринде тиешелүү документтер толтурулуп, аңчылык эрежелерин бузгандыгы үчүн Укук бузуулар жөнүндө кодексине ылайык жаранга 12 500 сом өлчөмүндө айып пул салынды.
Маалым болгондой, ок атуучу куралга байланыштуу жагдайларга укуктук баа берүү жана мыйзам чегинде андан аркы чараларды көрүү үчүн тиешелүү материалдар Ноокен райондук ички иштер бөлүмүнө өткөрүлүп берилди.
Рейддик иш чара Жаратылыш министрлигине караштуу Экологиялык жана техникалык көзөмөл кызматынын Биоресурстарды контролдоо бөлүмүнүн жана Жалал-Абад регионалдык башкармалыгынын кызматкерлери тарабынан биргеликте жүргүзүлгөн.
