Өлкөдө пайдубалы түптөлө элек үйлөрдөн батир сатууга тыюу салынды
Кыргызстанда курулуштун "нөл цикли" (имараттын пайдубалы түптөлүп, жер алдындагы курулуш иштери толук бүткөн баскыч) аяктаганга чейин турак жайларды жана коммерциялык объектилерди сатууга жана жарнамалоого тыюу салынды.
Маалыматка ылайык, бул талап курулуш министри Нурдан Орунтаевдин буйругу менен бекитилген.
Эми пайдубал куюлуп, жер алдындагы бардык курулуш иштери толук бүткөндөн кийин гана жарнама берүүгө, сатууга жана келишим түзүүгө болот.
Мамлекеттик архитектура-курулуш контролдоо департаменти мыйзам бузууларды көзөмөл кылат.
Учурда департамент тарабынан түшүндүрүү иштери жүргүзүлүүдө.
Курулуш компанияларынын жетекчилерине буйруктун талаптары тааныштырылып, белгиленген тартипти сактоо жана мыйзам бузууларга жол бербөө боюнча эскертүүлөр берилди.
Мекеме мыйзам бузуу фактылары аныкталган учурда жоопкерчилик каралганын эскертти.
Күндүн негизги жаңылыктары — Telegram каналыбызда
Каналга катталуу
