Манас шаарында 500 орундуу мектеп ачылды
Бүгүн, 5-ноябрда Манас шаарында Р. Азимов атындагы жаңы мектептин ачылыш аземи болуп өттү. Ага Министрлер кабинетинин төрагасы Адылбек Касымалиевдин онлайн катышты.
Курулуш министрлиги билдиргендей, жаңы мектептин курулушу үстүбүздөгү жылдын февраль айында Курулуш министрлиги тарабынан башталган.
Объекттин жалпы наркы 426 миллион сомду түздү. Архитектуралык долбоорго ылайык, мектеп үч кабаттан туруп, 500 окуучуга ылайыкталган. Имараттын жалпы аянты 6 364 чарчы метр.
Мектеп заманбап үлгүдө курулуп, предметтик окуу кабинеттер, лаборатория, китепкана, ашкана, компьютердик класс, жыйындар залы жана спорт зал бар. Мындан тышкары, мектептин аймагында футбол аянтчасы курулган.
Имаратты электр энергиясы менен камсыздоо үчүн күн панелдери да орнотулган. Мектептин курулуш иштеринин сапаты Курулуш министрлигинин алдындагы тиешелүү департаменттер тарабынан көзөмөлгө алынган.
Күндүн негизги жаңылыктары — Telegram каналыбызда
Каналга катталуу
