Чункурчакта коопсуздук талаптары текшерилүүдө

Чүй облусунда жайгашкан "Чункурчак" тоо лыжа базасында рейддик иш-чара өткөрүлүүдө. Бул тууралуу Жаратылыш министрлигинен кабарлашты.

Рейддин жүрүшүндө базадагы асма жолдордун техникалык абалы, эксплуатацияланып жаткан жабдуулардын коопсуздугу, алардын белгиленген талаптарга шайкештиги жана өнөр жай коопсуздугу боюнча ченемдердин сакталышы текшерилүүдө.

Билдирүүгө караганда, рейдде мүмкүн болуучу авариялык кырдаалдардын алдын алуу, техникалык мүчүлүштүктөрдү өз убагында аныктоо жана туристтер менен эс алуучулар үчүн коопсуз шарттарды түзүү маселелерине өзгөчө көңүл бурулууда.

Иш-чаранын негизги максаты — 2026–2027-жылдардагы кышкы туристтик сезонго карата тоо лыжа базасынын даярдыгын баалоо, ошондой эле эс алуучулардын коопсуздугун камсыздоо жана өнөр жай коопсуздугунун талаптарынын аткарылышын көзөмөлдөө.