Ош мэри мамчиновник Алимжан Байгазаковго таандык үйдү бузуу тапшырмасын берди
Жеңишбек Токторбаев мурдагы вице-мэр, учурда Эсептөө палатасынын аудитору болуп иштеп жаткан Алимжан Байгазаковго таандык төрт кабаттуу имаратты буздуруу боюнча тапшырма бергенин Ош шаарынын мэриясы билдирди.
Бүгүн эртең мененки рейд учурунда мэр тиешелүү кызматтардын жетекчилери менен бирге Тилек Баатыр көчөсүндө, эски автовокзалдын жанында жайгашкан объектти жеринде көрүп чыкты.
Муниципалитеттин маалыматына ылайык, аталган имарат эски автовокзалдын аймагында жана Ак-Буура дарыясынын суу коргоо зонасында, тийиштүү уруксат кагаздары жок салынган.
Мэриянын билдирүүсүндө белгиленгендей, имараттын ээсине аны бузуу боюнча бир нече жолу расмий эскертмелер берилген. Бирок ушул күнгө чейин имарат толугу менен демонтаждалган эмес.
Мэр аталган объект менен катар анын жанында жайгашкан башка курулуштарды да, анын ичинде өз багыты боюнча көптөн бери колдонулбай калган эски №1 автовокзал имаратын буздурууну тапшырды.
Шаар администрациясы буга чейин мэрдин тапшырмасы менен ушул эле аймакка жанаша жайгашкан, мурдагы вице-мэрге тиешеси бар "Кристалл" мейманканасы да бузулганын эске салды.
