“Мурас” турак жай комплексиндеги 1104 батирдин ачкычы ээлерине тапшырылды
Бүгүн Президент Садыр Жапаров Бишкек шаарындагы Бегматов жана Маликов көчөлөрүндө Мамлекеттик ипотекалык компания тарабынан курулган эки турак жай комплексинен батирлердин ачкычын тапшыруу аземине катышты. Президенттин басма сөз кызматынын маалыматына караганда, бул “Мурас” турак жай комплексинин 3-этабы. Буга чейин 2 этапка бөлүнүп, 2066 батир пайдаланууга берилген болчу.
Жаңы батирлердин ээлеринин кубанычын тең бөлүшкөн өлкө башчы чогулгандар алдында сөз сүйлөп, үйгө муктаждардын үй-жайлуу болушу менен бирге өлкөбүз стратегиялык максаттарды ишке ашырып жатканын белгиледи.
“Урматтуу мекендештер! Бүгүн 1104 батирдин ачкычтарын өз ээлерине тапшырсак, бул аймактан 3170 батирдин курулушун толук бүткөрүп, берген болобуз. Алдыда 4-этабынын курулушун кийинки жылдын июнь айында бүтүрүү тапшырмасын бердим. Анда 1584 батир берилет. Ошентип, “Мурас” турак жай комплекси жалпы 39 блоктон турган 4754 батирди камтыйт.” – деп билдирди мамлекет башчы.
Садыр Жапаровдун айтымында, бүгүнкү күндө республика боюнча жалпы 9371 батир пайдаланууга берилип, жарандар өзүлөрүнүн жаңы үйлөрүндө жашап жатышат. Ошондой эле Мамлекеттик ипотекалык компания өлкөнүн жети дубанында, 65 объектиде 83 миңден ашуун батирдин курулушун жүргүзүп жатат.
Билдирүүгө караганда, бүгүн “Мурас” турак жай комплекси менен бир эле убакта шаарыбыздын Кара-Жыгач конушунда 105 батирлүү жаңы турак жайдын ээлерине дагы онлайн негизде ачкыч тапшыруу аземи болуп өттү.
