Курулуш министринин орун басары 500 миң сом маяна кайдан чыкканын түшүндүрдү
Курулуш, архитектура жана турак жай-коммуналдык чарба министрлигинин бардык кызматкерлери жогорку маяна алышпайт. Министрдин орун басары Талантбек Иманакун уулу Жогорку Кеңештин өнөр жай саясаты, транспорт, отун-энергетика комплекси, архитектура жана курулуш боюнча комитетинин жыйынында айрым кызматкерлер эмне себептен 500 миң сомго чейин айлык алышы мүмкүн экенин түшүндүрдү.
Анын айтымында, Кыргызстанда архитекторлордун саны аз, ал эми технологдор өлкө боюнча болгону сегиз эле адам.
"Архитекторлор 6–7 жыл окушат. Долбоор даярдоодо алар бир чарчы метрине 15–20 доллардан алышат. Мурда Архитектура департаменти жок болчу, министрлик долбоорлорду өзү жасабай, жеке компанияларга берип келген. Ошондо депутаттар: “Эмне үчүн чоң институт өз алдынча долбоор чийип бере албайт?” деп сурашкан. Биз департамент түзүп, архитекторлорду жана конструкторлорду жумушка алдык", — деди министрдин орун басары.
Ал мисал катары айлык акысы 477 миң сом болгон бир кызматкерди келтирди. Ошол эле учурда бул каражат бир эле долбоор үчүн жана чоң көлөмдөгү жумуш үчүн төлөнгөнүн белгиледи. Мындай айлык ар ай сайын берилбейт, айрым учурларда бир нече ай бою таптакыр айлык албай калышы мүмкүн.
"Бардык кызматкерлер мындай айлык алышпайт. Курулуш министрлигинин борбордук аппаратындагы 45 кызматкер Каржы министрлигинен айлык алат, ал эми 2 миң 236 кызматкер бюджеттен бир тыйын да алышпайт. Биз — өзүн өзү каржылап, мамлекетке салык төлөгөн жалгыз министрликпиз. Менин айлыгым 64 миң сом, ал эми Жогорку Кеңештин башкы адиси 80 миң сом алат", — деди Талантбек Иманакун уулу.
Буга чейин Жогорку Кеңеште министрликтин саясаты сынга алынган, анткени ал турак жай бааларынын өсүшүнө алып келип жатканы айтылган. Ошондой эле депутаттар министрдин социалдык тармактарда айрым кызматкерлер 500 миң сомго чейин айлык алат деп мактанып жазганына нааразы болушкан.
